Malta se Tospita d-19-il Forum Annwali tal-Kapijiet tal-Patrimonju Ewropew (EHHF) fl-2025
Is-Sovrintendenza tal-Patrimonju Kulturali (SCH) hija kburija li ħabbret l-aċċettazzjoni tagħha tal-presidenza tal- European Heritage Heads Forum (EHHF) matul it-18-il Laqgħa Annwali li saret fi Krakovja, il-Polonja, f’Diċembru 2024. Dan it-tragward sinifikanti jimmarka l-bidu ta’ kapitlu ġdid għal Malta fil-kollaborazzjoni dwar il-wirt internazzjonali u jistabbilixxi l-istadju għad-19-il laqgħa Annwali tal-EHHF, li se ssir f’ Malta fl-2025.
X’ inhu l-EHHF?
Il- European Heritage Heads Forum (EHHF) huwa netwerk informali li jiġbor flimkien mexxejja tal-wirt nazzjonali minn madwar l-Unjoni Ewropea, iż-Żona Ekonomika Ewropea, u l-Istati Membri tal-Kunsill tal-Ewropa. In-netwerk irawwem djalogu professjonali u jservi bħala pjattaforma għall-iskambju ta’ informazzjoni u għarfien espert dwar il-ġestjoni tal-ambjent storiku fis-seklu 21, b’enfasi fuq il-wirt mibni, il-pajsaġġi, u l-arkeoloġija.
Ir-Rwol tal-Laqgħa Annwali
Kull laqgħa Annwali tal-EHHF tiġi organizzata madwar tema ċentrali magħżula mill-pajjiż ospitanti. Dawn it-temi jirriflettu kemm l-isfidi nazzjonali kif ukoll dawk internazzjonali li qed jiffaċċja l-wirt kulturali filwaqt li jindirizzaw kwistjonijiet topiċi. Temi preċedenti inkludew il-wirt f’ sitwazzjonijiet ta’ emerġenza, il-wirt kulturali urban, u l-interazzjoni bejn il-wirt u t-turiżmu.
Fit-18-il laqgħa Annwali fi Krakovja, it-tema, Heritage in Emergency, iffaċilitat diskussjonijiet dwar approċċi u teknoloġiji għall-protezzjoni tal-wirt kulturali waqt kriżijiet. Id-delegati qasmu għarfien dwar kif diversi Stati Membri jimmaniġġjaw emerġenzi nazzjonali li jaffettwaw il-wirt kulturali.
It-Tema ta’ Malta 2025: Il-Konvenzjoni tal-Belt Valletta
Bħala parti mill-presidenza tagħha, is-Sovrintendenza tal-Patrimonju Kulturali hija entużjasta li tospita d-19-il laqgħa Annwali tal-EHHF fl-2025, li tikkoinċidi mal-presidenza ta’ Malta tal-Kunsill tal-Ewropa. It-tema tal-laqgħa se tiffoka fuq il-Konvenzjoni Ewropea dwar il-Protezzjoni tal-Wirt Arkeoloġiku (riveduta), komunement imsejħa l-Konvenzjoni tal-Belt Valletta.
Adottata fl-1992, il-Konvenzjoni riveduta tal-Belt Valletta tenfasizza t-theddid dejjem jikber għall-wirt arkeoloġiku kkawżat miż-żieda fil-proġetti ta’ kostruzzjoni u żvilupp. Il-Konvenzjoni tenfasizza l-importanza tas-salvagwardja tal-wirt arkeoloġiku bħala parti vitali mill-memorja kollettiva Ewropea u riżorsa siewja għall-istudju storiku u xjentifiku.
Din it-tema mhux biss tirrifletti l-impenn ta’ Malta lejn il-prinċipji deskritti fil-Konvenzjoni iżda tisħaq ukoll fuq il-ħidma kontinwa tas-Sovrintendenza fl-ibbilanċjar tal-iżvilupp mal-preservazzjoni tal-patrimonju.
Inħarsu ’l quddiem
Is-Sovrintendenza tal-Patrimonju kulturali hija ħerqana li tilqa’ mexxejja tal-wirt minn madwar l-Ewropa għal Malta fl-2025. L-avveniment se jservi bħala pjattaforma biex japprofondixxi l-kollaborazzjoni, jikkondividi l-għarfien espert, u jirrifletti dwar l-isfidi kondiviżi fil-preservazzjoni tal-wirt kulturali tal-Ewropa.
