Tlett Ijiem ta’ Skavi, Żjarat u Attivitajiet madwar Malta: Il-Jiem Ewropej tal-Arkeoloġija 2025
Is-Sovrintendenza tal-Patrimonju Kulturali għandha l-pjaċir tħabbar li l-Jiem Ewropej tal-Arkeoloġija (European Archaeology Days) se jsiru għal darb’oħra f’Malta fit-13, 14 u 15 ta’ Ġunju ta’ din is-sena. Dawn il-ġranet se jkunu mimlijin attivitajiet għal kull età u interess. Entitajiet u assoċjazzjonijiet minn diversi oqsma se jkunu qed jiftħu l-bibien tagħhom għall-pubbliku, sabiex juru s-sbuħija tad-dixxiplina tal-arkeoloġija u x-xogħol interdixxiplinari marbut mal-kura u l-preservazzjoni tal-wirt kulturali.
Viżitaturi kellhom -ċ-ċans jaraw wara il-kwinti fis-sit arkeoloġiku tal-Latnija. Prof. Eleanor Scerri mill-Istitut Max Planck, Prof. Nicholas Vella, Dr Mario Mata-Gonzalez mid-Dipartiment tal-Klassiċi u l-Arkeoloġija, u Dr Ritienne Gauci mid-Dipartiment tal- Ġeografija fl-Università ta’ Malta, flimkien ma’ Chief Officer Kevin Borda mis-Sovrintendenza tal-Patrimonju Kulturali, membri mit-tim ta’ riċerka wara l-iskoperta rivoluzzjonarja riċenti fis-sit ta’ Latnija nqagħdu għal żjara u diskussjoni unika ‘fuq is-sit’.
Għal min għandu għal qalbu l-wirt kulturali ta’ taħt il-baħar, il-Global Maritime Archaeology Program fi ħdan id-Dipartiment tal-Klassiċi u l-Arkeoloġija fl-Università ta’ Malta, flimkien mal-Underwater Cultural Heritage Unit fi ħdan Heritage Malta, organizzaw open day fis-sit kostali ta’ Salina. Il-viżitaturi kellhom iċ=ċans ukoll jipparteċipaw f’esperjenza virtwali “Dive into History” 360°, u jinteraġixxu ma’ artefatti li qed jiġu rkuprati.
L-Assoċjazzjoni tal-Klassiċi ta’ Malta, fi sħab mad-Dipartiment tal-Klassiċi u l-Arkeoloġija fl-Università ta’ Malta, ospitat taħdita pubblika minn Becky Xerri. It-taħdita ddettaljat ir-riċerka tad-dottorat li l-kelliem qed twettaq fil-qasam tal-wirt kulturali fl-isfera tal-arkeoloġija ta’ taħt il-baħar. L-idea tal-aċċess għal siti arkeoloġiċi taħt il-baħar se tiġi diskussa fid-dawl tal-għan tar-riċerka: it-tfassil ta’ qafas għat-twaqqif, il-ġestjoni u l-komunikazzjoni tal-wirt kulturali.
L-istudju jiffoka b’mod speċifiku fuq parks arkeoloġiċi f’ilmijiet fondi, b’referenza partikolari għall-ftuħ reċenti tal-Park Arkeoloġiku tax-Xlendi.
Heritage Malta ipparteċipat ukoll fil-Jiem Ewropej tal-Arkeoloġija ta’ din is-sena b’numru ta’ siti u attivitajiet miftuħin għall-pubbliku, fosthom il-Mużew Nazzjonali tal-Arkeoloġija, Kordin III u is-Sit Preistorju ta’ Tarxien.
Il-Jiem Ewropej tal-Arkeoloġija, li issa qegħdin fir-raba’ sena tagħhom f’Malta, huma parti minn inizjattiva fuq livell Ewropew immexxija mill-Ministeru Franċiż tal-Kultura u l-INRAP (Institut National de Recherches Archéologiques Préventives), taħt l-awspiċji tal-Kunsill tal-Ewropa. Dan l-avveniment għandu l-għan li joħloq attivitajiet innovattivi u interattivi sabiex jintroduċi lill-pubbliku mat-teżori tal-wirt nazzjonali u is-sigrieti tax-xogħol arkeoloġiku professjonali.
